نهار ديكلارينا بإلياس المالكي

بحال كل صباح ديال لحد فقت ومشيت لجوطية نخدم بقيت غادي كنتمشى على رجلي نتقاصد فلوس الطوبيس وفطريق بانت ليا جقلة ديال الناس قدام لمحكمة دايرين موضاهارا و كايغوتو "وا شدو المالكي..وأقصى العقوبات وا القرآن خط أحمر" ضربت فسّاعا ديال تيليفوني لقيت لحال باقي هي ضرب ليا فلخوا قلت والله تا ندخل وسطهم نشوف اش واقع.

مني دخلت وسطهم عجبوني دوك الشعارات لي كيقولو مجموعين بصوت واحد ومخلط بين صوت الرجال و العيالات كايخرج واحد الصوت جماعي زوين فيه الحنان ديال صوت لعيالات و الحروشية ديال صوت الرجال، داك لجو كيخليني نتبورش وبقيت تا أنا كنغوت معاهم "واك واااك على شوها كتوب الله حرفتوها" "ويا والي يا باشا لمالكي خصو عكاشة" مهم بقينا كنغوتو بجهد بصوت واحد وبداو الناس كيتزادو وكيغوتو معانا تا وصلنا شي سبعين واحد هوما يجيبو لينا لبوليس ولمخازنية ضورونا دارونا لوسط، ولحق يتقال مضربوناش بقينا هكاك تال واحد شويا هو يخرج لوكيل عندنا بكوستيمتو وبدينا كنصفقو عليه وكنصفرو وكنغوتو عاود "ألي لوكييل ألي ألي لوكيل ألي.." "وا لوكيل جيناك ليوم تاخد لينا حق المضلووم" هو يقولينا لوكيل أهيا نتوما! نقصو شويا هاد لهايلالة سكتو شويا را مكنسمعكم مكتسمعوني لمهم أنا مغنقدش ندخلكم كاملين باش نسمع لمطالب ديالكم ديرو بيناتكم شي لجنة تمتلكم وتدخل عندي يكونو فيها شي عشرا باراكا.

نقز واحد الراجل شيباني قالينا وا شكون فيكم أجماعة لي مسكْوَلْ شكون قاري فيلافاك؟ ومع سمعت ديك لافاك فرحت قلت اول مرا لافاك تحمر ليا وجهي قدام بنادم أنا نهز يدي وغوت بجهد باش كلشي يسمعها: انا ماستر وهزات واحد لمرا يديها وشي دراري وبنات تاهوما مهم تا كملنا عشرا ودخلنا وأنا تالهنا والله معارف اش واقع ومعارفش تا شنو دار لمالكي 

ماعلينا..دخلنا عند الوكيل ستقبلنا وقالينا مالكم باش كطالبو وعلاش هاد لهايلالا كاملا صدعتونا..نطقات ديك لمرا قالت ليه واحد اليوتيبر سميتو المالكي حرف القرآن نعاماس قاليها شمن سورة حرف؟؟ هيا تقوليه معارفاش سميتها ولكين معلماها بحاسد اذا حسد هاديك لي حرف وبقينا حنا كولنا كنقولو اييه اييه هاديك نعاماس..شويا هو يكعا غوت علينا واش نتوما جايين دعيو واحد حرف سورة قرآنية معارفينش سميتها؟ هو يشوف فيا وقاليا نتا أبونضاضر جاوب سميت السورة لي حرف هادا انا شويا نزق ومطور شديت ديك حاسد اذا حسد وقلت مع راسي متكون السورة سميتها غا سورة الحسد أنا نقول ليه بكل ثقة سورة الحسد نعاماس مازال تا ما جمعت فمي من ورا ديك الدال لخرا لي نطقت أتا سمعت فوحهي سمرملاق ضرت بلخف لقيتو واحد لبوليسي واقف ورايا قاليا فين كاينا شي سورة سميتها الحسد ألحمار هادا را تاهو تحريف هو يدير ليا لمينوط مع لكرسي وخلاني كالس..

هو يعاود لوكيل نفس السؤال لواحد لبنت قاليها سميت السورة لي حرف لمالكي قالت ليه معرفتش هو يجعر وبدا يغوت معارفاش سميتها وباغا دعيه يالله قولي ليا غا سميت الآية لي حرف عرضيها عليا، هيا تقوليه حرف ديك خاسق اذا وقف نعاماس هو يوقف الوكيل وبدا كيغوت: خااااسق؟؟؟ اذا وقف؟؟؟؟ وقف أبنت لقحبى!!! هو يقوليه لعلوي مينط هادي تاهيا تهمة التحريف..

عاوتاني سول لوكيل واحد الراجل معانا فاللجنة لي بغات دعي لمالكي حيت حرف القرآن قاليه نتا عرض عليا الاية لي حرف لمالكي هو يقوليه داك الراجل أولا وقبل كل شيئ أود أن أتقدم بجزيل الشكر لسيادتكم المحترمة و الموقرة التي تواضعت واستقبلتنا، -هنا لوكيل عجبو لحال بقا كيقاد الصدفة وحمارو حناكو- ثانيا سيدي الوكيل المحترم غاسق ماشي خاسق كيما غلطات الاخت قبل مني، هنا فرح لوكيل قال بينهم عاقل أوا لاباس..هو يسولو شنو كتعني ديك غاسق؟ هو يسكت هاداك وحدر راسو قاليه والله معرت نعاماس غا قمرت عليها هو يضرب ليه العلوي لمينوط تاهو..وصلات نوبت واحد الشاب خر قاليه نتا قوليا سميت السورة لي حرف المالكي؟ هاد الشاب تاهو ماستر فلافاك كنشوفو تما بغا يدير بحالي زعما مطور  قاليه سورة الغاسق أسيدي هو يطرشو قاليه لعلوي تا هاد لحمار مينطو وعمر ليه تحريف 

 سولنا واحد واحد و تا حد فينا معرف شي جواب هو يسولنا مجموعين قالينا آخر سؤال يا غتجاوبو عليه يا غندي يماكم ترباو قولو ليا هاد السورة لي حرف لمالكي مكية ولا مدنية؟ ناض لغوات شي كيقول مكية شي مدنية انا قلت زعما نشد لعصا من لوسط قلت ليه بجوج نعاماس مكية ومدنية فنفس الوقت هو يعاود يطرشني العلوي وقاليه هادو كاملين وتا دوك لي على برا شدوهم وديهم لحبس العواد 

كلهم عندهم تهمة المساس بالمقدس وتحريف القرآن و ازعاج السلطات وتقديم بلاغ كاذب...كون غا دخلت سوق كري ومشيت لجوطية شقربني لشي حماس ولا لخرا صدقنا ضاربين معاهم غا لحبس على والو