شذرات من حياة الجّرتومة فالمدرسة 2

                                                                           علاش مانسيتيش سروالك؟

غي كنريح نخمم فشنو داز على الجرتومة يامات لبتيدائي كنعدرو على طريق الحبس لي شد. واحد لخطرا عطانا كاد أن يكون رسولا واحد البحث نخدموه فالدار على التلوث البيئي ولا شي لعبا بحا هكا ومشينا لديورنا كل واحد فينا كيفاش خرج داك لبحث لي عندو بيسي فدارهم را خرجو  ليه باه ولا خوه ولا مو من تما نيت ولي معندوش را عطاوه والديه لفلوس ومشا دا خمسة دراهم لسيبير وخرجو ليه، أنا كنت من لي داو سانكة لتيمومي مول السيبير وعطيتو العنوان دلبحث مزال مكملت هضرتي قاليا تانتا بحث البيئة والتلوث..باينا سبقوني شي عشرة دلخوت قبل مني وتيراوه لموهيم خرجت لقلاوي وشريت ملف زوين بتلاتة دراهم  وديت لبحث للدار بلا تا منقرا آش فيه. الجرتومة مسكين اليد قصيرة و العين بصيرة السيبير غا كيشوفو موحالش تا واش فايت داخل ليه، كيسحابو را شي حاجة مامديوراش للناس لي بحالو داكشي لاش ماتسوقش لبحث ومشا كايميخل فشي زبالة مع سكان الهامش ولا حاط لخاوي دلبيرة هو و ولاد لبرارك كايتعلمو فيهم التير. وتا يلا بغا يخدم داك البحث را معندوش فلوسو حيت خونا مقودة عليه ديال بصح يمكن را كان عايش تحت الفقر. مني وصلات وقت لقراية دخلنا عند كاد أن يكون رسولا وأول حاجة دارها هيا بدا كيدور يشوف واش درنا البحث لي طلب منا ولا لا وبدا كيضور وكايجمع فالضواسا، ها بنت لمودير جايبا لبحث فملف عامر لصاقات عمرنا شفنا بحالو وها ولد لفسيان مخرج البحث بالألوان وها ولد لموعليم كاتب البحث بالألوان وملي وصل للصف اللخر لي فيه الجرتومة و مشتاقته وبطيبعت لحال  لقاه مدايرش لبحث وهو يقوليه إوا نتا فين لبحث لي عطيتكم؟ الجرتومة بكترت لخوف ولحشمة وماراضيش يقوليه قدام التلامد لخرين معنديش لفلوس باش نديرو، بدا كايقلب فالشكارة ويقلب بين لكتوب لمشركة ديالو زعما را  نساه و كاد أن يكون رسولا بقا لاصق ليه عند راسو كيتسنا وكيتسنا فيه و يمكن كاع يلا كان كايدعي فخاطرو يا ربي مايكونش دارو باش يخوي فيه المشاكيل السيكولوجية ديالو ويعدب ربو تاني. شافيه الجرتومة بواحد الشوفة كلها مزاوكة ورغيب، عينيه كانو كيقولو لكاد أن يكون رسولا الله يرحم ليك بيها الوالدين لاما فوتني هاد لخطرا وميك عليا را والله مداير شي حاجة فهادشي باش نتفرشخ تاني را هادشي خارج على طاقتي وأنا غا فيكتيم ديالو ماشي الجاني. بقا كيشوف فيه الجرتومة هو ينطق: نسيتو فالدار أساد. هو يبدا عليه لي شويا يكون رسول بالنوكات: أ أ نسيتي البحث وعلاش مانسيتيش السروال؟ والقسم ديال الأطفال كامل كايضحك  عليه. قاليه سير وقف حدا الصبورة تانسالي ليك.ناض  الجرتومة حدا الصبورة كولو كايترعد. كمل كاد أن يكون رسولا التقلاب ديال المستضعفين التلاتة لي بقاو كانت بنت وجوج دراري تاهوما مداروش داك البحث لأسباب وظروف جتيماعية قاهرة خارجة على الاستطاعة ديالهم ماليهم فيها هوما تا قلوا. مني نوضهم برعبة لصبورة كاد أن يكون رسولا ناض كيقلب فالخزانة ديالو لي حدا لبيرو على شي لعبا مني ملقاهاش شاف فالموجتاهيد لي كالس فالطاولة اللولة قاليه سير للقسم لاخر د السي فلان قوليه قاليك السي كمال عطيه التيو لحمر، مشا داك الدري كيجري وفرحان حيت سخرو لموعليم من دون الناس يجيب التيو. مني جاب التيو بدا كادا ان يكون رسولا كايشحط بيه دوك ليدين الصغار ديال دوك الأطفال لي مادارو تا حاجة تستاهل داك العنف كامل وبدا ولد لقحبى كاينزل عليهم واحد واحد بحر جهدو وكايستمتع بالغوات و الدموع ديالهم وهوما صغار بزاف بواحد الأجساد نحيفة غا الراس لي فيهم..هاك ليماك أأ هاك لوالديك باش مرا خرا متنساوش شي حاجة عطيتها ليكم..مور داك المشهد السادي لي كولنا شفناه عطاهم عقوبة يكتبو "أنا كسول" ميات خطرا ويجيبوها غدا هيا ولبحث، رجع الجرتومة ومشتاقته لآخر الصف كيف ديما وبدا كل واحد فيهم كايحاول يبرد دقتو بطريقتو هالي حاط يديه مع جعبة ديال طاويلة وها لي كايصوت فيها بفمو وخنونتو كتسيل بكترت لبكا وها لي كيدير ليها دفال ودموع هابطين ليه وكلهم كايقفقفو وكايترعدو بلخوف.الموعليم مكانش عادل فالعصا والتكرفيص ومكانش كايخدم مبدأ المساواة فشكون غايوشم ليه التيو لحمر فيدو، كان كايسلخ غا أشباه الجرتومة وكايتحاسب غا معا المستضعفين من القوم لي عارف ومتأكد بيلا را لا طاقة لهم وماعند ربهم تا شي جهد باش يديرو شي حاجة وماغاديش يجيو والديهم يتشكاو علاش ضربتي ليا ولدي؟ ولا لاش عاقبتيه وضحكتي فيه التلامد لي معاه فلقيسم وحتا كاع يلا جاو غادي يزرب عليهم ودغيا غادي يدعقهم حيت هوما فآخر الأمر را غا دراوش لا فلوس لا عيلم لا هم يحزنون.والدليل دهادشي هو فايت لينا واحد الصباح ناض السي كامل دزب يراقب التمارين لي عطاني نخدمو فالدار ومني لقا بنت واحد لاجودان ديال الجوندارم بقا كايسولها وكيضحك معاها وغير بلكلام لحلو علاش أبنتي مدرتيس تميرنات؟ قالت ليه كنت مريضة أساد وصافي مزادش لهضرا وكتر من هادشي صدق عافي على سكان الهامش فالصف اللخر الجرتومة ومشتقاته وقال بلي هاد نهار مغاديش يراقب التمارين.وكان الجرتومة فقمة السعادة ديالو حيت هاد نهار مغاديش يتبهدل ويتخلا دار بوه. 

فاش كنفكر فهادشي كنقول هاد ولد لقحبى ديال الموعليم علاش محاولش يفهم مال هادو من دون لوخرين مداروش التمارين وعلاش مجابوش البحث بحال لوخرين؟ علاش هاد ولد لقحبى محاولش يعطيهم فرصة ويفهم فيها الظروف لي خلاتهم ميخدموش البحث. والمشكل لمقود هو دوك لملفات كاملين شدهم ولاحهم فلخزانة عندو بلا تا ميقراهم ولا يطل عليهم والصراحة النظرة ديالي وديال أغلبية التلامد فلقيسم لي قرا فيه الجرتومة خديناها من عند كادوا ان يكونوا رسلا والتصور ديالنا لهاد الفئة الاجتماعية بنيناه من عندهم حيت هوما لي خلاونا نقصيوه من بيناتنا وهوما لي صوروهم لينا فداك لعمر بحال شي كائنات دونية تحت منا وماصالحين لوالو من غير التهميش و لعصا والاحتقار. حنا فداك لعمر كان كيبان لينا الموعليم مقدس و أي حاجة دارها را هيا صحيحة داكشي لاش مكناش كنتعاطفو معا الجرتومة ولي بحالو وكنا كاع كتر من هادشي كنقصيوهم من بيناتنا ومكنبغيوش يريحو معانا فالطاويلا ولا يتجمعو معانا مني كنخدمو مجموعات كنا كنشوفوهم حتالة المجتمع وباقي فينا لي لدابا وخا كبر كايشوفهم بنفس الشوفا.