تخيل تكون بنت

واقيلا راه من بين أساليب التعديب لمقودة فهاد لحياة هيا تكون بنت فلمغريب،أنا را غير غا كنبغي نتخيل راسي بنت فهاد لبلاد كنحط يدي على راسي وكنصفر بقا عاد نحل عيني فيها ونلقا عندي جوج بزازل وترمة كولشي طامع فيها خلاها زهير بونيف فواحد تويت ديالو: " ماعرفت كي كيديرو يعيشو لبنات فلغريب و كولشي باغي يحويهم " لاجيتي تفكر فهاد لبلان غتلقا بلي را اللهم تحل عينيك فلمغريب زاوج ولا فرخ مربيه زوز فلوغ ومتحلهومش ونتا بنت.را لبنات فهاد لبلاد مريحين فراس ديال لبيراميد د لمعاناة وا تخيل راسك عطاتك الطبيعة  بزازل كبار و شي ترمة خارجة بحمرا لحطة لي ضربتي كتخلي التضاريس ديال ديك لكسدة باينة وكتخلي ريوك مغريبي ريدبيلي سايلين، ويلا بغيتي تمشي غا تسخر لحانوت تجيب لخل ولا شي خمارة دلحلوا كاتلقا راسك وسط سيركوس شارلي كل ميترو ضربتيه كيخصك تفانتي بنادم باغي يحويك من جميع الفئات العمرية ها لي عاصر ليك قدام لباب كيتنسا غا فوقاش تخرج مولات الزووك باش يبدا يصفر ويبسبس هالي تابعك كيقرا ليك الشعر فودنيك هالي كيطل عليك من سرجم وكيحك زبو بشهوا وعاد مني غتقرب لحانوت غايخصك دوز من راس درب وغادي تلقا شباب الأمة لي بكا عليها سيد النبي مجموعين غا كيضربو عليك بعينيهم كتبدا عندهم لكومبيتيسيو ديال النكّان شكون لي غادي يلوح ليك أحسن جملة بلقافية.كايخصك دوز من هاد سطاجات كاملين غا باش توصل عند مول لحانوت لي خارج غا تشري منعندو لخل وخمارة د لفاني كتلقاه تاهو مجمع معا شي إويس نتمازيرت متكي ليه على لكونطوار،مكتجي فين تعطيه بضهرط تا كيبدا عليه لمليح أودا علي تماخيرت تبارك الله بنت من هادي؟ تامول لحانوت وصاحبو باغيين يحويوك. 

وفروتور را كتعاود دوز من  نفس سطاجات عاوتاني تناقز ديال سيركوس شارلي ومخصكش تجاوب تا واحد منهم ومترد لهضرا على تا حد فيهم حيت يلا مشيتي تا سبيتي شي واحد كيتزلل عليك كاينساو الناس بلي را هو لي فوتيف وكتبان ليهم غا نتا بدوك لبزازل و ديك ترمة لمكضرة وكيبداو يتهامسو تفو كترو لقحاب؛شو كي كتخسر لهضرا زيادة اللور الخ الخ...هادشي ألقلاوي غا تشهيتي كيكة بغيتي تمشي لحانوت لي قريب ليكم تقدا لمقادير ديالها وشو اش طرا.وا دابا صاوبتي لكيكة ودرتي طريف منها فصاك ودخلتي لبيتك تلبس حوايجك باش تمشي لليسي كتلبس لي بغيتي من ماريوك وكتمشط شعرك كيف بغيتي مكتجي فين تلبس صباط تا كيوقف عليك خوك وا حيد لقلاوي وا بربي لا خرجتي بهاد لحالة واش غادا لليسي ولا لسواري..كتلقا كرك فموقف ضعف معندكش الحق تعتارض وكتمشي تبدل دوك لحوايج لي ختاريتي بلحوايج لي ختار ليك لموجتاماع فصيفت خوك،غاتلبس جلابة وغادير زيف وغخرج تاني للعالم د سيركوس شارلي وهكاك وغادي يخصك تقبل دوك نوطات ديال "جلالب ولقوالب" و "احح على مولات لبلدي"

كتطلع فطوبيس لي كايدي لليسي كتلقاه مبلاني ببنادم لي باغي يحويك معا كتشد فلبارة بيديك كاطلع ديك جلابة لي بغاك خوك تلبس باش تستري كتصدق مبينة التضاريس ديالك كتر من سروال دجين باش كنتي أتخرج فلول وهنا  كايجي وراك راس لحربة ديال أولامبيك إيمحكيكن كايحط ليك زبو فكرك نيشان و كايبدا يتمحكك عليه لعل وعسى يجيبو قبل ماتوصل لمحطة لي غتنزل فيها، كايولي ملاصق معاك غا كتحس بلقالب كاتبغي ضورترمتك لشي جيهة خرى كاتصدق حاطها بلغالاط لشي حد خر فزبو كايفهمها هو بلي  را زملتي و بغيته يحويك وغايبقا تابعك تال لباب ليسي

كاتهبط من طوبيس وكادخل لليسي لي كتقرا فيه كتلقا الاستاد و التلامذ ولحارس العام و لعساس وشجر و لخزانة وروبيني كولهم باغيين يحوييك..هيا هاديك ما كتجي فين توصل ديك الستة باش تخرج من ليسي اتا كتلقا داك لي حطيتي ليه ترمتك فطوبيس بلغلط باقي واقف كيتسناك كيسحابو درتيها بلعاني وعطيتيه أمل يحوي غادي بقا لاصق ليك كرك على النمرة دلواتساب مغاديش تبغي تعطيها ليه غايسبك ولا غايضربك وغاتمشي ديكلاري بيه على التحرش فأقرب كوميسارية غايستقبلك لبوليسي لي مكلف تما غادير شكاية و غاتعمر لمعلومات ديالك غايقوليك خلي لينا نمرتك باش لكانت شي حاجة غانعيطو ليك يالله كتوصل للدار كتسمع ففف ففف ديال تيليفون كتلقا لبوليسي لي درتي عندو الشكاية سيفط ليك ميساج فيه كوكو أنا لبوليسي د قبيلة عجبتيني وبغيت نهضر معاك تا هو باغي يحويك.