شذرات من حياة الجّرتومة فالمدرسة 3

النظافة من الإيمان 

 واحد نهار كنا داخلين عند لموعليمة نزهة،وقبل من هاد نهار قالت لينا أي واحد غايجي بشعرو ولا بودنيه ولا بضفارو موسخين غانتفاهم معاه،من الحصة لمجاية بغيت كولشي يبقا يجيني نقي و زوين را النظافة من الإيمان و الوسخ من الشيطان و الإيمان را كايدخل مولاه للجنة ونتوما بغيتو الجنة ولا لا؟ جاوبناها بصوت واحد "نعاااام يا مُعلّمتي بغينا الجنة" يمكن من مور هاد الحصة الجرتومة وضواحيه فالصف اللخر قطعو تيكي فتريبين دجهنم. هيا هاديك مني دخلنا لقيسم وكولاّ شد بلاصتو. ناضت لموعليمة نزهة من لبيرو ديالها لابسة جلابة فالزيتي ضاربة فوق منها طابلية بيضة ماساداش صدايفها وخاركة على راسها زيف كحل،كانت قصيرة وغليضة وكبيرة فلعمر،لون وجها كان زركْ بحال شي واحد مقجوج ،بغيت نوصف ليكم سنانها ولكن مكناش كنشوفوهم بزاف حيت كانت قليلت الضحكة ديما معبسة ومعصبة،الشوفات ديالها كانو كايدخلو لينا واحد الرعب و لْخلعة مقودين أما لا مشات حتا غوتات بداك لحلق عندها را كيضرب زلزلال فلقيسم،كايبان ليك قيسم كامل فيه ربعين طفل كاملين كايترعدو وكايطلبو سيدي ربي فنفسهم غا فوقاش يجي الفرج ويصوني الجرس نخرجو نتقودو كنا كنتنساو داك لجرس كتر من نهار لاكلاس ديال الحبّاسة. سادا نزهة هزات فيديها واحد لخشبة طويلة ومسطحة وبدات كادور صف بصف تتقلب لينا شعرنا وتتشمو مزيان ياكما فيه شي ريحة خانزة وكتخرج عينيها  تشيرشي بيهم على شي وسخة صغيرة نسينيها فودانا و كادوز على الضفار تقلبهم تاهوما ويلا كانو طوال ولا بين اللحم والضفر لاصق لوسخ فراه غاتديك للدوش ديال لمدرسة وغادوش ليك وغاتعطيك مقص ضفار جديد مطبوع فيه اللوغو ديال وزارة التربية و التعليم و فوطة جديدة وشامبان وصابونة وسطيلة ديال لما ترشها على وجهك باش تفيق من هاد لحلمة أولد لقحبى. مني وصلات للصف اللخر تقلب الجرثومة لقاتو من الكفار لي مباغيينش يدخلو للجنة حيت مني ضربات بعينيها على شعرو لقات واحد لغوفالا بيضا جامعا الغبرة و الخملة وريحتو مجهدا وحامضة هيا تسد نيفها بصبعانها وغوتات بجهد "إيييف إيييف إييف" شهاد لعفن واش مكاينش لماااا ما كاينش شامبان؟ وبقينا حنا كاملين عاطيين الصبورة بضهرنا كنتفرجو فسادا نزهة واقفة على الجرثومة كتبهدل فيه عاود وكنضحكو كاملين بجهد. مني قلبات ليه ودنيه صرفقاتو ديريكت وبدات كتغوت عليه أويلي شهاد الحالة فين عايش نتا؟ واش مكاينش لما أعباد الله؟ يالله بغا يشرح ليها الجرثومة بيلا را اه را بصح معندهومش لما وبلي عندهوم غا السقاية دلكاريان منها كايعمرو لما فالطونات ولبادا..مخلاتوش يكمل هضرتو وقالت ليه قطع لحس متردش عليا لهضرا هو يسد فمو ورضا بالمكتوب اش عند لميت مايدير قدام نزهة؟ قالت ليه أرا نشوف دوك ليدين لهنا مني وراهوم ليها لقاتهم كاملين مشْكين،موسخين وكايتقشرو غابوحدهم،كانو كحلين بتراب لكاريان ولاكريس دسيكليس،وجهو كانت مشوطاه الشمس وكان مقمموش ومضروب فيه بزايد وعنقو فيه بزاف ديال النقاطي دلبهك وفيه واحد جرحا كتبان باقيا جديدا ولكن سادا نزهة اللينعلطبومنها متسوقاتش لهادشي،هيا همها غا النظافة داكشي لاش بانو ليها غا الضفار الطوال لي شادين اللون لكحل وجامعين وسطهم لوسخ،شافت داكشي وبدات كتعربط عليه هيا تقوليه ارا يديك لهنا، عطاها يديه وكمش صبعانو بحالا هاز شي قبسة ديال لملحة وبلاصاهوم قدامها،هيا تهز ديك لخشبا تالفوق ونزلات ليه بيها على ضفارو بوووووك بوووووك..را بحالا ضربك الضو واللي مجرب هاد الضربة ديال ضفار غايحس بيها..الجرثومة مع كل ضربة كانت كتجيه لدوك صبيعات كايغوت بحر جهدو "وااااالا أسادا ااااااااياياي عافااااك أسادا" وكايبدا يفركل بحال شي حنش تقطع ليه الراس ولكن ولا من مستجيب را بحال يلا كان كايغوت فشي حلمة داير ليه فيها بوغطاط ميوت.كان لغوات ديالو كايعطيها غا الجهد بنت بنت لقحبى وعاد ماكانت كاتزيد ضربو بديك لعصا لضهرو  وفخاضو وكتغوت أرا لوالديك صبعانك طلققق..وكايكمش الجرثومة دوك صبيعات عاود وكايمدهم ليها بزز منو وكاتنزل عليهم بديك لعصا بووووك بوووك..وكايعاود يجر يديه ويحركها بلحر عالله تبرد وتهدن وبينما تكالمات ليمنية كيعيطها مسكين ليسرية وهيا واقفة ليه عند راسو كتسنا فوقاش يكمش دوك صبيعات تاني باش تهبط عليهم بديك لخشبة..وهادشي كامل طاري قدام مايقارب الربعين طفل كايتفرجو فجلسة تعذيبية على المباشر غايبقاو هازين الآثر ديالها إلى أن يرث الله الأرض و من عليها. 

من ورا ماسلخاتو مزيان وبكاتو وحكراتو وعفطات على البراءة ديالو وزادت رسخات لينا الفكرة ديال الجرثومة غا موسخ ومكلخ ومعفون وماكايستحقش يكون معانا فلقيسم ومكايستاهلش نلعبو معاه ولا نريحو حداه فالطاويلة ومانشاركو معاه كتوب منعتقوه بقلم زايد وعاد مازدنا حنا كنطلعوها عليه وكنضحكو عليه بلا رحمة وبلا شفقة وكنا واخدين راحتنا فهادشي حيت السي كمال و سادا نزهة تاهوما داروه وهوما كاع لي عطاونا شحنة إضافية باش نقصيو الجراثيم لي معانا فلقيسم بلا منحسو بتاشي دنب..مهم من مور السلخة لي كلا الجرثومة ناضت سادة نزهة للصبورة كتشرح لينا كيفاش انو الماء و الصابون أشياء متوفرة فكاع المنازل وكتشوف فالجرثومة وكتقوليه سمعتي وكايحرك ليها راسو مسكين لفوق ولتحت زعما اه سمعتك.هوسمعك ولكن نتي واش سمعتيه أبنت القحبى؟ واش حاولتي تفهمي مال هاد لولد جا لقيسم موسخ؟واش مني شفتي وليّد صغير يديه مقشرين وعنقو مبهك ومجروح مجاتك لراسك تسولي مال هاد لولد هكا؟ آش عندو وشنو مخليه موسخ هكا؟ كون سولتي هاد الأسئلة كنتي غتعرفي بلي الجرثومة معندوش داك المنزل لي دايرا عليه الدرس بقا غا يكون عندو الما و الصابون وكنتي غتفهمي بلي الدري ساكن غا فبراكة دزنك ولقزدير ولما كايشدو عليه الصف فالسقاية دلكاريان. وسباب لكحلولية ولوسخ لي مجموع  فضفارو كنتي غتعرفيه جاي من لخدمة لي كايخدم مع السيكليس لي فلعيمارات. ولكن والو نتي لا رحمة لا شفقة قبل متعطيه فرصة يشرح ليك سلختيه وعدبتيه على شي حاجة ماشي هو المسؤول عليها،واش الجرثومة هو لي مسؤول على السكن و الما؟!واش هو المسؤول على الفقر؟ الدري حل عينيه لقا راسو من سكان الهامش لي شطبهم المجتمع للجناب باش يخلي لوسط نقي.

 مني صونا الجرس باش نخرجو قالت  سادة نزهةللجرثومة سمع نتا الحصة لماجية ماتجيش الى مجبتيش مك ولا باك.فالغد ليه وحنا باديين الحصة تا كنسمعو الدقان فلباب ديال القسم ناضت سادة نزهة خرجات حدا لباب حنا بكترت لفضول لي فينا ديما كنطلقو ودنينا لا جا شي حد جيهت لباب وأنا كنت كالس فالطاويلة التانية جيهت لبيرو وكان  كاع داكشي لي طاري فلباب كايبان لي،شفت الجرثومة بشكارتو لي مطبوع فيها سبايدرمان بلا راس وبلا يدين محاتو المحنة ديال الحياة لي كيعيش.كان واقف هو و واحد لمرا من بعد عرفتها مو،مرا قصيرة ورقيقة لابسا جلابة خضرا وزيف حمر مرسومين فيه وريدات مختالفين وفرجليها لابسة صندالة دلميكا زرقا،وجها كان مكمشو الزمان ومني كانت سادا كتهضر معاها كانت هيا حانية راسها بحال لي كايحانيه ولدها فلقيسم.واحد شويا بدينا كنسمعو لغوات ديال سادة نزها كانت كتغوت على ماين الجرثومة وبدات كتحاسب فيها على الوسخ دولدها بقات كتقوليها "واش نتي أم؟كيفاش مخليا ولدك فهاد الحالة! هادشي را لا يعقل ألالة! ورا معندك حتا شي عذر لهادشي..ومني مقادينش على دراري تربيوهم ماتولدوهومش را غير كتعدبو فيهم وكتكرفصو فيهم" ماين الجرثومة ولات حمرا وتزنكات وماعرفات ما تقدم ما توخر والجرثومة مسكين من بعد مكان كايتبهدل غا هو فالمدرسة ولات تا مو كاتبهدل فيها وقدامو وقدام التلامد وقدام الأقسام لوخرين لي حداهم..ماين الجرثومة بدات كطلب فسادة بلي هادشي ماغاديش يتعاود مابغاتش تشرح ليها الوضع حيت فهمات بلي غير غاضيع معاها لحجرات ومغاديش أصلا تخليها..قالت ليها سادة نزهة الليسامح ولكن ألالة الليهديك راعيو لوليداتكم شويا؛قالتها بنت لقحبى بحال يلا هيا كاتراعي ليهم،وقبل متمشي ماين الجرثومة بحالها شدات سادة نزهة يديه وكانو كاملين زورق بكترت لعصا لي عطاتو لبارح هيا تهزهم و وراتهم لماين الجرثومة قالت لها شوفي اش كاايبان ليك هنا؟ قالت ليها ماين الجرثومة الزروقية ديال لعصا لي عطيتيه هيا تنقز سادة نزهة لا لا أشريفة خليك من داكشي شوفي هاد لوسخ لي بين ضفارو واش أنا كنوريك القمر ونتي كتشوفي ليا فصبعي! بنت لقحبى ديك الزروقية ودوك صبعان لمنفوخين بقوت لعصا لي كلاو لبارح كاع مابانو ليها بلي را مشكل هيا المشكل عندها هو لوسخ لي بين ضفار..بقات ماين الجرثومة كتشوف وقالت ليها صافي ا أوستادا هادشي عمرو يتعاود ومشات حانية راسها محاملاش الحياة وكارها هاد الحكرة و الظلم لي من نهار حلات عينيها وهيا وفيه ودخل الجرثومة للقيسم حاني راسو وتاهو محاملش هاد تبهديلا لي تبهدل هو ومو فشي حاجة ماعندهم ليها جهد ولا طاقة.