من تيمولاي للداربيضا

 قرات معايا واحد لبنت سميتها فاطيمة كانت كتسكن فتيمولاي واحد لفيلاج  صغير جا فلجنوب دلمغريب. الناس ديالو كااملين شلوح وكايهضرو غا بالشلحة وهيا اللغة ديالهم تما. فاطيمة الظروف خلاتها ترحل هيا ومها و جوج خوتها صغر منها من تيمولاي لكازا،لحقو على باهم لي كان خدام عساس على واحد لفيلا  فحي فكاليفورنيا.باين فاطيمة كان ضبر لمها على خدمة دير لميناج عند مالين لفيلا لي خدام عندهم داكشي لاش جابهم كاملين لكازا وكراو بيت فالسطح فحي الدريسية. باين فاطيمة مكانش باغيها تقرا كان خايف عليها من المدينة و ماليها وكان كيخاف لا تخرج من تحت جناحو وتعلق ولا يتعدا عليها شي واحد وماليه جهد يكالي عليها وكان أصلا باها كيشوف بلي لمدرسة صالحا غا لبوقلوا أما لبنات را حدهم الدار يا دارهم يا دار راجلها،ولكن مها كانت شرطات عليه قبل ماتجي لكازا بلي فاطيمة غتكمل قرايتها ولا مجايينش،مها كان عندها أمل كبير فيها كانت كنتسناها تقرا وتكبر وتخدم وتخرجهم من ديك لعيشة دزب بيت فسطح ولخدمة مني يطلع الشمس تا تهبط كانت هيا المهدي المنتظر ديالها.باها وافق وخلاها تقرا وأول نهار غنشوفو فيه فاطيمة فالقيسم كان جابها باها وهضر معا الموعليمة شرح ليها بيلا عاد نتاقلات من مدرسة فتيمولاي لهنا ومشا بحالو.فاش دخلات عندنا لقيسم جاتنا فشكل وبانت لينا مختالفة علينا كانت لابسة صاية طويلة فلبيض  وتريكو حمر دالصوفة تالعنق ودايرا الزيف وكانت لابسة فرجلها واحد لعيبة بحال لبلغة والشربيل. كانت كتبان كبر منا شويا. قدماتها لنا الموعليمة وقالت لينا بيلا زميلة جديدة من بلاصة بعيدة لتاحقات بينا وقالت ليها قولي للزملاء ديالك شي حاجة،حنات فاطيمة راسها وتزنكات هيا تقول بصوت خافت "ماعرفتْ" وسكتات،ردات عليها الموعليمة قالت ليها قولي ليهم شي حاجة متحشميش هيا تشوف فينا وقالت بداك الصوت الخافت "شي حاجة" هيا تفركع لموعليمة بالضحك وبدينا تاحنا كنخراو بضحك وهيا واقفا فالصبورة فأول نهار ليها فالمدرسة ديال هاد لمدينة ولات ضحكة،بداية موفقة لطالبة العلم،الموعليمة شدات كرشها بالضحك ومقداتش تحبس الضحكة هيا تقوليها واقيلا مفهمتينيش را قلت ليك قولي شي حاجة زعما شي كلمة للزملاء ديالك أفاطيمة ماشي تعاودي نفس هضرتي،بقات فاطيمة مزنكة وحانية راسها وقالت ليها عاود بداك الصوت الخافت "ماعرفتْ أنا هادشي سمح ليا أ وستاد" وبدات تاني لموعليمة كاتخرا بضحك وحنا كننضربو الطاويلات بكترت الضحك،ضحكنا عليها حيت معرفاتش تركب جملة صحيحة بالداريجة بلا منعرفو بلي را فاطيمة دارت مجهود مقود ديال بصح باش تركب ديك الجملة وتنطق بيها قدامنا ولكن ومع الأسف لا حنا لا للموعليمة ماراعينا لهاد البلان..من مور ماشبعات الموعليمة وحنا ضحك على فاطيمة سيفطاتها تريح فبلاصتها وكملات الموعليمة الدرس. داك نهار كانت عندنا القراءة والموعليمة كانت كدير لينا واحد لبلان،كاتعطي لشي واحد فينا يقرا شي نص وحنا خص نتبعو معاه فالكتاب ديالنا وعلى غفلة كتعزل شي واحد يتبع القراية ديال النص ويلا لقاتو مامتبعش غاتوشم ليه التيو لحمر فيدو،داكشي لي كان بدا واحد لولد كايقرا هيا تغفل فاطيمة وقالت ليها التلميذة الجديدة تابعي..فاش جات فاطيمة تبع وتقرا النص بدات كاتهجا ومكاتقدرش تلاقي الحروف مزيان كانت كاتقرا الجملة غا بزز وكانت كاتسرط الألف و اللام بزاف مثلا "يلعب الأطفال بالكرة" هيا غتقراها هكا "يلعُبْ أطْفالُ بكُرةِ" وحنا كنا كنخراو بضحك جاتنا غريبة شي واحد فالرابع ومايقدش يتهجا العربية، مكناش عارفين بللي صعيب عليها بزاف تهجا وتنطق بالداريجة بقا غا اللغة العربية السيدة را اللغة الأم ديالها هيا الشلحة وهيا لي كتعرف تهضر بيها وتفرض عليها تعلم تلاتة ديال اللغات فخطرا وحدا حيت بزز منها خصها تعلم الداريجة باش تواصل مع الناس وخصها تعلم اللغة العربية باش تقرا وعاد زيد الفرونسي تاهيا..الموعليمة صعرات عليها وبدات كتغوت عليها واش هادي حالة تلميذ فالرابع؟؟نتي را خص يرجعوك للتحضيري تعلمي تهجاي بعدا؟ معرفتش أنا كيفاش المدرسة لي قريتي فيها نجحوك تا وصلتي للرابع!؟ لا لا لا أنا منقبلش شي تلميذ المستوى ديال طايح هكا أنا غنهضر مع لمدير! فاطمة  كانت كتحشم وكنتزنك ختنا درويشة بزاف، بقات غا لابدا وساكتة كتسمع فالسبان من لي  على بونت كادت تولي رسول ولكن سيدي ربي عايق بهاد ولاد لقحاب كان عارفهم مراض فكرهم داكشي لاش خلاها معاهم غا فكاد،الموعليمة متفاكاتش معاها وحلفات تا تعدبها وحرجها قدامنا هيا تنوضها للصبورة وقالت ليها هزي الطباشير،هزاتو،قالت ليها كتبي الحروف من الألف تال لياء،حنا مني سمعناها قالت كتبي الحروف بقينا كنضحكو وكنتهامسو مع بعضياتنا "ناري لحروف واخويا محمد الصغير ويعرف يكتبهم" فاطيمة بكترت الحكرة و التبديق لي تبديدقات فنهارها اللول معرفاتش تكتب ماشي معرفاتش ولكن تستريسات هيا تجبد الموعليمة التيو لحمر وغوتات عليها بجهد كتبيي،فاطيمة بلخلعة طلقات الطاباشير من يديها وبدات كترعد  فالصبورة هيا تقول بداك الصوت الخافت "ماعرفتْ" هاد لمرا متفركعاتش لموعليمة بالضحك لي تفركع هو لفخض ديال فاطيمة بواحد الشحطة من داك التيو لحمر خلاتها تشطح أحواش صحة بقات كشحط فيها بيه ولبنت مسكينة مولفا خليان ضار بوها كانت غي كتكالي بيديها وتا لغوات مكانتش كتخرجو بجهد كنا كنسمعو غا اممم اححح  اييي ألا أولد لقحبى ماشي توحيح لي فبالك را توحيح ديال لعصا هادا ونتا عقلك فيه ألحوا..بقات كتشحط فيها وكتغوت عليها ألكسولة خليك واقفة هنا متحركيش جوج دقايق انا جاية، بقات فاطيمة وقفة والدموع فايضين من عينيها وكتحك فخاضها ولبلايص لي جا فيهم التيو،شويا تمات الموعليمة داخلة وجايبة معاها واحد لولد صغير كايقرا فالتحضيري قالت ليه كتب أولدي الحروف من الألف إلى الياء..شد داك لولد الصغير الطباشير وبدا كايكتب وكتب الحروف كاملين من الألف تال لياء هيا تعطيه القرآة قالت ليه قرا أولدي هاد النص هو يتهجاه وكان تهجاه حسن منها هيا تقوليها عرفتي هادا فاش كايقرا را كايقرا فالتحضيري وكايقرا حسن منك نتي لي فالرابع.فاطيمة بقات غي كتشوف ودموع نازلين من عينيها خافت لا تشرح ليهم الوضع ديالها بالداريجة ويبداو عاود كيضحكو عليها حيت متعرفش تركب لجمل صحاح وحيت كتخلط الشلحة والداريجة فجملة وحدا.مقدراتش تشرح لموعليمة بيلا را خصها تراعي واحد شويا للظروف ديالها حيت هيا را شلحة وكابرا مع الشلوح وكتهضر غا بالشلحة وبلي هيا را عندها تحدي كبر من لي عند التلامد لوخرين لي كاتقارنهوم معاها ولي كابرين فالمدينة وكابرين بالداريجة وحالين عينيهم على سبايستون و المرأة المجرمة وسامانتا وأرتينز تعلمو منهم اللغة العربية قبل مايدخلو للمدرسة.مقدراتش تشرح ليها بلي داك مبدأ تكافؤ الفرص لي فارعين لينا بيه كرنا را ماكاينش هنا حيت راس المال الثقافي كيلعب دور كبير فالمدرسة وخا كنقراو نفس المقرر أوستادا را ماشي كولنا عندنا التلفازة نتفرجو فسبيستون وماشي كولنا واليدينا قاريين يراجعو معانا الدروس وماشي كولنا كنبداو السباق من نفس المسافة ديال الإنطلاقة أوستادا وماشي وماشي...رجعات فاطيمة لبلاصتها ومني صونا لجرس وخرجنا للساحة تجمعنا عليها ودرناها وسط منا وبقينا كنهضرو معاها وكنسولوها  بحالا كنهضرو مع شي نوع متخلف من الجنس البشري مزال ماتطور،كنا كنعطيوها شي جملة بالدارجة وكنقولو ليها تعاودها ومني كتعاودها كتعوجها ومكتعرفش تنطقها مزيان  ولا كتنطقها بلكنة مشلحة وكنخراو عليها حنا بضحك وتاهيا كانت كضحك معانا صحكة بريئة وكايحمارو خدودها وكتحط يديها على فمها بلحشمة يمكن كان كيسحابها را حنا صحابها الجداد ورا كنضحكو معاها وماشي عليها بقينا كنتخراو على شكون غادي يقوليها الجملة باش تعاودها كان زحام وكتسمع غا "فاطيمة فاطيمة قولي هادي،عاودي هادي" وكايبان ليك بنادم كايخرا بضحك.

صونات التانية ورجعنا لقيسم ودخلنا عند لمعلم دلفرونسي  شافها جديدة وعيط ليها قاليها آ عنصر جديد معانا أهلا وسهلا شنو سميتك؟

-فاطيمة

-واش عاد نتاقلتي ؟

-يا اح اه

-يا جايا من الشينوا نتي كيفاش يا

-حنا: هاهاهاهاهاهاع كاخ كاخ بضحك

فاطيمة تزنكات عاود وحشمات وحنات راسها وقالت ليه انا من تيمولاي أوستادة

غي قالتها حنا نخراو تاني بضحك وكنضربو طاويلات والموعليم تاهو كايخرا بضحك وتا فاطيمة مسكينة كضحك وسادا فمها بيديها،معارفاش بضبط بيلا را عليها كولشي كيضحك ماشي معاها ولكن كانت فاهما بلي را ماشي بلاصتها هاديك وبلي مكتنتاميش لهاد لبلاصة.

هادا كان أول نهار لفاطيمة معانا فالمدرسة وآخر نهار ليها حيت من داك نهار ماعاودات رجعات تقرا..وتاحد متسوق ليها سولو عليها نهار لي غيبات من بعد بحالا معمرها كانت،غالبا من ورا هاد لحكرا لي تحكرات فأول يوم ليها فالمدرسة غتكون ضورات لهضرا ديال باها فراسها ولقاتها فالحالة ديالها عندو الصح.