أنا و العدالة ج1

 الجزء الأول:

سمحي ليا بزاف ألواليدا حيت مقلت ليك والو على هادشي لي غنعاود فهاد السطورا مزال مسرطيتش داكشي لي طرا لخويا بدر الدين ومزال لموت ديالو جمرة شاعلة فوق قلبك زدتك جمرة خرا بغيبتي لي مكان عندك عليها تا خبار مكنتي عارفاني حي ولا ميت،سمحي ليا أمي عافاك والله مكان عندي شي حل آخر من غير نخبي عليك، بغيتك تعرفي أمي بلي عمرها دازت شي دقيقة بلا منفكر فيك ويسيلو دموعي كيف شي دري صغير.وبغيت تا الواليد وصحابي لقراب رشيد و سيمحمد يسمحو ليا تاهوما على هادشي لي غنكتب،بغيتكم تسمحو ليا حيت خبيت عليكم هادشي ومعمرني نطقت بشي حرف منو لشي حد فيكم وخا كنتو قراب ليا بزاف، سمحو ليا حيت نهار غبرت مقلت لتاشي حد فيكم لافين غادي لاوقتاش غنرجع ومعمري سيفطت ليكم خباري،وبغيت صاحبتي مريم يلا كانت غتقرا هادشي تسمح ليا بزاف على داكشي لي درت معاها وتسمح ليا حيت كاع داكشي لي كنا كنبلانيو ليه بجوج يامات لافاك وكاع لبلانات لي كنا كنحلمو بيهم من زواج وتكمال لقراية برا ولبروجي لي كنا غنبداو بجوج ضربتو ليها فالزيرو وخليتها معارفا راسها من رجليها وكنتمنى تكون بيخير وتكون كملات حياتها مزيان. هادشي راه كان صعيب عليا بزاف وماشي قرار ساهل هادا لي خديت وداكشي لي تعدبت بسبابو ولي مزال كنتعدب لدابا را منقدش نوصفو ولكن را  لغايب حجتو معاه وانا حجتي هيا لي غنعاود ليكم دابا. قبل منبدا لهضرا على شنو درت وشنو لي خلاني نبعد عليكم بلا منقول ليكم تاشي حاجة وبلا مانتواصل معاكم فهاد المدة كاملا، بغيت بعدا نقوليكم بيلا راني بيخير فصحتي،كنهضر على لكسدة، أما الصحة النفسية را منقد نقوليكم عليها والو من غير مشركة لطراف صغار وكل نهار كايزيدو دوك طراف يتشركو لطراف صغر منهم بسباب هادشي لي درت وبسباب فراقي عليكم، راني توحشتكم بزاف را فكل ليلة كنشد تصاوركم وكنبقا نبوس ونعنق فيهم تا كنفزكهم بدموعي عاد نطلقهم، لي خصكم تعرفوه قبل منعاود ليكم قصتي هو راني خويت لبلاد من نهار لي مابتش فيه فالدار وغتسمحو ليا عاود حيت مغنقدش نقوليكم شمن بلاد فيها أنا دابا وشنو كندير فحياتي.قبل  مندخل فليديطاي ديال لغيبة ديالي ونشرح ليكم شنو درت غادي نهضر على تفاصيل خرى حيت هادشي يقدرو يقراوه ناس خرين مفاهمينش كولشي بحالكم داكشي لاش غادي نرجع بيهم لوقت باللور لهادي ربعطاش لعام ، فاش كان فعمري أنا طناش لعام وخويا بدر الدين كان فعمرو 26 عام

أنا سميتي إلياس ولد عائلة بيخير عليها لواليدا أستاذة ديال لفرونسي فالليسي و لواليد عندو محال كبير ومعروف فالمدينة لقديمة ديال لماكن دالصابون و التلافز ولبارابولات،فرارن وكاع داكشي ديال الإلكتروميناجي،عندي خويا واحد سميتو بدر الدين كبر مني،عندنا دار ديالنا فيها تلاتة الطبقات كنا ساكنين فيها بوحدنا مكارين تا طبقة حيت مامخصوصينش.هادي ربعطاش لعام كان خويا بدر كايخدم مع لواليد فالمحال وأنا كنت باقي كنقرا فالسادس ابتدائي فواحد ليكول بريفي،فهاد لوقت كان خويا بدر عاطيها غير لاصال ديال الحديد و شريان لحوايج الدوريجين و لقصاير مع صحابو وصحباتو،كان خويا بدر دري زوين ومبوكص ومهلي فراسو بزايد،كان عزيز عليه يشري لحوايج و لماكن والروايح لغاليين كانت هادي هيا لبلية ديالو.كان دري مقبول بزاف و كايخري بضحك تكلس معاه غتبقا غي شاد جنبك و كتبكي بكترت الضحك والتقشاب،قليل بزاف فاش غتشوفو كاعي ويلا كاع شفتيه كاعي را غتلقاه كعا غا حيت الساعة لي كان باغي يشري مكايناش فاللون لي بغا،كان كيبغي الحياة بزاف وكانت عندي معاه واحد العلاقة زوينا بزايد،واخا لفرق لكبير لي بيني وبينو فلعمر كان ديما كايعمر معايا نقصرو فلبلاي بجوج ونخرجو ناكلو على برا بجوج ونتفرجو فالأفلام و السيريات بجوج وكان ديما كايديني معاه مني كايبغي يسافر مع صاحبتو لشي مدينة،كان سخي معايا بزاف أي حاجة بغيتها ومبغاتش لواليدا ولواليد يشريوها ليا كايجيبها ليا. كنا عايشين حياتنا بيخير بحال كاع العائيلات مرا ضاحكين مرا مقودين السوايع، كل نهار ونهارو ولكن أغلب الوقت كنا ديما ضاحكين فالدار وبيخير تال واحد الليلة مع 4 ديال الصباح كنسمعو الدقان فالدار بجهد  فقت أنا ومقدرتش نحل خفت وتخلعت أنا نفيق لواليدا قلت ليها مي فيقي را شي حد كايفرع لباب ناضت لواليد كاتولول وناض معاها لواليد قالت شكون؟

-البوليس ألالة حلي

حلات لواليدا لباب كنت انا حداها ولواليد باقي كيلبس عليه شي حاجة باش يخرج عندهم،قالت ليهم لواليدا ياك لاباس أسيدي شهاد لوقت جايين عندنا! راه الربعة ديال الصباح هادي!! مالنا قاتلين روح؟ 

هو يجاوبها داك لبوليسي قاليها:

-سمحو لينا بزاف يلا فيقناكم ولكن را جانا الأمر من لفوق، واش هنا كايسكن بدر الدين الحمراوي؟

-لواليدا: آه هنا كيسكن ياك لاباس آش دار ولدي ؟؟

-واش كاين أشريفة ولدك فالدار دابا؟

-لواليدا: آه كاين راه  جا من لخدمة تعشا ونعس فبيتو

-سمحي لينا ألالة ندخلو عندنا إذن باش نعتاقلوه

لواليدا غير سمعات ديك نعتاقلوه هيا ضور بيها الدنيا وبدات كتغوت: بدرر دررر بدرر  مشات باش تفيقو هوما يتمو داخلين وراها لبوليس للدار تبعوها تال بيتو،كان خويا بدر عاد فاق  مفاهم تا لعبا مزال مقاد يفرق بين الحلمة و الحقيقة،باقي بحوايج نعاس الشورط و الديبارضو غير شافوه هو ينطق واحد لبوليسي واش نتا هو بدر الدين الحمراوي؟ قاليهم اه ياك لاب..مزال مكملها هوما ينقزو عليه تلاتا دلبوليس فوق لبياص ديالو  بحالا  كان هاز فيدو كلاشنيكوف ومخبي الدرون فلماريو،ولاد لقحاب دارو ليه لمينوط صحة وخا هو مكانش كيقاوم ومزال تا مستوعب شطاري،بقات لواليدا كتغوت "ولدي ولدي! بشويا على ولدي مداير  والو" ولواليد كايحاول يفهم آش واقع عندو فالدار كايقول لداك لبوليسي أشريف عافاك غي شرحو لينا اش واقع راكوم غالطين!جاوبو لبولسي بأجي لكوميسارية وتعرف،خويا بدر ماغوت ماسب ماربب ماوالو بقا غير كايقول لمي وبا متخافوووش راه غير شي سوء تفاهم را مكاين والو أمي راه باينا سوء تفاهم بقا كيعاود فيها تا طلعوه لسطافيط،وهوما جارينو لواليدا كاتغوت بحر جهدها تا فيقات الجيران وكولشي تم كيطل وخارج للزنقة كايتفرج شي كايواسي وشي كايتشفا،أنا مزال قدام عيني داك لمنضر كنبكي وتابعو بلحفا كنغوت على لبوليس لي جارينو  "طلقو خويا،طلقو خويا" وتا حد مسمعني ولا تسوق ليا لا أنا لا لرغيب لواليدا ولبكا ديالها كانو كيخسرو علينا غا دفيع وهاد الجملة"تبعوه لكوميسراية وتعرفو".ديمارات سطافيط وداتو لكوميسارية، لبسات لواليدا جلابتها ولواليد لاح عليه الفوقية وانا مشيت غا بشورط وتريكو بيهم كنت ناعس وتا من رجلي لقيت راسي لابس صندالة فردة ديالي وفردة دصندالة لواليد،مشينا كانجريو لكوميسارية نشوفو آش طاري وعلاش داو خويا بدر؟ مني وصلنا لكوميسارية تلاقينا لبوليسي لي فالدخلة دلباب سولاتو لواليدا كتلهت "أشريف واحد لولد عاد دابا جابوه لهنا بلمبنوط لابس شورط و ديبارضو راه ولدي بغينا نشوفوه نعرفو اش واقع" قالينا داك لبوليسي اه راه عاد دخلوه سيرو سولو لداخل غيشرحو ليكم، دخلنا كاملين حنا لقاو داك لكوميسير لي جا للدار مينط خويا بدر، نقزات عليه لواليدا و قالت ليه انا مزاوكة هاعار الله لاما قولي شنو طاري را دخنا جاوبها ولد لقحبى بلا ميعطيها تا شي اهتمام "منقدو نقولو ليك والو ألالة سيري تال غدا ورجعي"  ومشا  كايضحك مع بولسي اخر ومخلينا حنا غانطرطقو بلفقصة وهوما كايتكيفو وكايكركرو بالضحك،رجع عندو لواليد قاليه أسيدي..هو يحمر فيه داك لكوميسر ولد لقحبى قاليه شنوو كاين مالك مصدعنا؟ عاد بغا با يقوليه بغيت نعرف غا ولد..هويغوت عليه لكوميسير قاليه را هضرنا غدا أجي تشوف ولدك ليوم مايمكنش راه فالتحقيق دابا،قاليه لواليد قولي غير شنو طاري،متسوقش نخلو وتحرك دخل لكوميسارية لداخل،.معطاونا تا شي جواب بقات لواليدا غير كتبركم ولدي ولدي ولدي وفيها السخفة وأنا معنقها وكنقوليها متبكيش أماما عافاك وكنبكي معاها ومخلوع مفاهم والو،لواليد هز التيليفون وصونا لواحد صاحبو كوميسير كان كيتعامل معاه فلمحل قاليه شنو كاين وشرح ليه لافير من اللول تال اللخر،قاليه داك لكوميسر هانا غنقلقل السوق ونرد عليك،بقينا سامرين كنتسناو غا لابيل ديال صاحب لواليد،غير صونات بالتلفة و الدوخة لي حنا فيها قطع عليه با فبلاصة مايجاوبو،عاد عاود صونا لواليد قاليه السي عبد السلام أمضرا آش طاري؟

-السي عبد الله غير تهدن وسمع مزيان هادشي لي غنقوليك وراه خصك تعرف بلي الغلط كايوقع وتا لبوليس را كيغلط حاليا وعلى مقالو ليا را ولدك  مشدود حيت مشتبه فيه فجريمة اغتصاب

-أولي كيفاش الاغتصاب ولدي بدر ميديرهاش لا لا بدرر! لا ميمكنش يغتاصب لا لا كاين شي غلاط لا لا..

-سمع أسي عبد الله غي بشوية عليك وحالو تحضر عقلك وتهدن وسير دير محامي فأقرب وقت وتبع ولدك را على معاودو ليا دراري لي شادينو راه كاينين الشهود لي كيقولو بللي شافوها  كايتكرفص على البنت

-الشهود!! أويلي! كاين شي غلط لا لا كاين غلط عفاك غير زيد تأكد أسي عبد السلام ولدي سميتو بدر الدين الحمراوي الألف و اللام و الحاء و الميم والراء..

-أسي عبد الله راه واحد لي جابو بلمينوط ليوم سميتو بدر الدين الحمراوي ماشي جوج را ولدك..مضيعش لوقت سير شوف شي محامي مزيان 

مور هاد لابيل خرجات لكشكوشة من فم لواليد هو يسخف،طاح وعيطو لومبيلونص صدقات دايا تا لواليدا تاهيا طاحت سخفات جات على راسها،وأنا ديك لوقت باقي دري صغير فعمري طناش لعام كنغوت وتالف ومخلوع وا بابا وماما وا خويا،كنت تالف و خايف لايموتو ونبقا بوحدي وبقيت كنكبي وكنغوت تا شدني واحد البوليسي ضريف بزاف عمرني نساه داني لواحد لكرسي و قاليا متخافش نتا راجل هادشي عادي دابا شويا وباباك وماماك جاو وخوك را ماغيكون غير لخير يلا مدار والو غايخرجوه،بقيت حدا داك لبوليسي تا رجعات لواليدا ولواليد من سبيطار، متعطلوش غا سحاو تمو جايين وجات تا جارتنا،خالتي رابحة و وراجلها هوما لي فيقو واليديا شويا و واكضوهم باش يحلو عينيهم من الصدمة ويديرو محامي دغيا ويتبعو القضية،داكشي لي كان لغد ليه فصباح مع النبوري دار لواليد محامي باش يتكلف بلقضية،قاليه با نعطيك لي بغيتي لي قلتي غاخرج ليا ولدي،قاليه لموحامي لا لا ماشي كيستيو ديال لفلوس را المسألة مسألة مبدأ ولدك خاااارج حسبو معاك فالدار،عطانا واحد الأمل كبير وفرحنا مني سمعنا هضرت لمحامي. وحنا كنتسناو قدام لكوميسارية عيط داك لكوميسير لي مينط خويا لواليد قاليه سير جيب ليه لفطور وجيب ليه مايلبس، مشينا انا ومي جبنا ليه لفطور ولواليد طلع بلموطور للدار جاب ليه لحوايج لي يلبس،قبل مندخلو عند خويا بدر لداخل تلاقينا بوليسي آخر فالدخلة هو يقولينا أراو نقلب هادشي لي جبتو ليه فاش قلب لميكة سولنا فين لكارو ديالو؟ قلنا ليه كاملين مكايكميش،قالينا لا را كيكمي راهو لي طلب باكية دلكارو،بقات لواليدا كتحلف ليه بلي مكيكمي مكيشرب هو يقاطعها لواليد قاليها را كيكمي مني كيكون فشي مشكل قاليها هادشي وجرها لجيهة لباب وهمس ليها فودنها را ولد لحرام بغا باكية دلكارو لراسو وحنا لي فينا يكفينا مقادين على صداع خر نجيبوها ليه وصافي..فاش دخلنا عند خويا بدر لقينا وجهو كامل منفوخ ولحمو رزق  بلعصا،قالت ليه مي: بدر أويلي مالك فوجهك واش ضربوك أولدي؟

-أمّي والله ماداير شي حاجة قسما بالله ما غتاصبتها وا مكنعرفهاش أمي مكنعرفهاش وا راني أمي مضلوم أبا والله تا مضلوم

قالت ليه مّي حنا تايقين فيك أولدي راك مربي أحسن تربية ومستحيل دير شي حاجة بحال هادي، را درنا ليك محامي وقالينا غايخرجك غي تهنا،بقات لواليدا كتوكل فخويا بدر وانا كالس ليه فحجرو ولواليد كايسولو على شنو طاري أولدي بضط شنو قالو ليك؟ هو ينطق بدر:

-لبارح قبل منجي للدار بالليل كانت شاداني لبولة بزاف ومقدرنش نحبسها تال الدار، ودخلت لجنانات د لعوابسي نبول عادي بحال أي مغربي تزير را كيقصد أقرب صور ولا زيتونة يسقيها،مني ساليت لبولة خرجت من جنانات كانطلع سروالي وكنسد صدفة ويالله كندير السمطة هو يشوفني العساس لي حدا جنانات قريت عليه السلام  غير من بعيد وزدت بحالي للدار هيا فاش جيت تعشيت ونعست وراها بشويا را جاو لبوليس وراكم شتو شنو طرا

نطقت أنا بعقل الصغر وبنيتي سلوتو:واش أخويا بدر هادشي كامل حيت بلتي فالزيتون ديال العوابسي؟ 

بقا كيخرا بضحك خويا بدر وخا المعاناة والمشكل لي فيه الضحكة مخطاتوش،قاليا: ألا ألحمق ماشي حيت بلت فالجنانات؛هيا تنقز مي كمل أولدي كمل!

-من مور ما خرجت أنا من جنانات كنقاد سروالي كيما سبق وقلت ليكم،دازت غير شي خمسة دقايق هي تخرج واحد لبنت كتبكي وكتغوت لعباد الله يعتقوها،كانت مغبرة وحوايجها مقطعين وعامرا جراحي ودمايات، وقفو عليها شي وحدين كريساوها وغتاصبوها بلا متشوفهم ولا تعرفهم، هادشي طرا لها بالليل فاش كانت خارجة من لكابلاج وخطفوها وزادو بيها لجنانات دلعوابسي تعداو عليها، لبنت بقات مغيبة مودا طويلا تما ومبان ليها تفيق من الغيبوبة ديالها وتخرج غا ورايا بخمسة دقايق باش بلت أنا تما،كون عرفت هادشي كامل غايطرا كون حبس لبولة ولا طلقتها فحوايجي ولا كون كاع بلت فالشانطي قدام لعساس..هيا تنطق لواليدا:

-مكتاب الله أولدي وكيتصرف فيه ميكون غير لخير را غنديرو لي فجهدنا باش نخرجوك من هاد لموصيبة..

لمكتاب غا عليا أنا أودي..ماعلينا مني  خرجات هاد لبنت تلاقات مع لعساس ومشات كتبكي عليه وفاش سولها على شنو  وقع عاودات ليه على اخر حاجة، بيلا تكرفصو عليها شي وحدين مشافتهمش رشو عليها شي حاجة سخفوها غالبا كريموجين، ولعساس مني رد سينتا اللور قاليها صافي صافي واقيلا عرفت شكون مولاها را شفت واحد لولد  عاد دابا خارج من هاد جنانات وكان عاد كيطلع سروالو ونيت بان ليان مامرتاحش وخايف، وقاليك تا واحد لمرا طلات عليهم من السرجم قالت ليهم اه والله يلا شفتو ولد لحرام كايطلع سروالو وخارج من جنانات را كيسكن غير فلحومة لي حدانا را ولد الأستاذة،هيا فاش صوناو للاسعاف ولبوليس...يتبع