أنا و العدالة: ج2

الجزء الثاني

مني جابوني هنا لكوميسارية دخلوني لجيور، بيت مخلط مع الناس كل واحد علاش جايبينو هالي سكران هالي لقاو عندو لحشيش هالي جاي على الضرب و الجرح..واحد شويا سمعت سميتي نوضوني وداوني لواحد لبيت اخر بحال شي بيرو، داوني ليه بوحدي كلسوني على كرسي  وبدا داك لكوميسير لقرع لي داني من الدار كيهضر معايا: سمع أولدي بلا متضيع وقتك ؤ وقتي غادي تعتارف لينا بكولشي وغادي تجبد السميات ديال دوك لي كانو معاك وأنا من جيهتي أولدي غانستاهل معاك وغنتعاون معاك وغنكتبها فالتقرير وهادشي غادي يخفف عليك الحكم بزاف يالله قوليا علاش تعديتو عليها؟ وشكون لي كان معاك؟عطيني غي السميات والله متخاف يالله دوي أولدي..

قلت ليه والله أشاف ما درت شي حاجة وا أقسم لك بالله تا دخلت لدوك جنانات غير نبول را مادوزت تا دقيقة تما وخرجت را غي تزيرت و بلت أشاف والله معارف شيحاجة على هادشي لي كتهضرو عليه وكنقسم ليك بالله معارف لا هاد لبنت لا شنو طرا ليها وا جيبها  لا قالت ليك انا ديوني والله وتقول أنا تانمشي ولكن راني مضلوم..قاليا لكوميسير نتا من النوع لي مكايتعاونش أ أ؟! مناش خايف واش باغي تهز لمونتيف بوحدك؟! زعما راجل غتستر صحابك؟غادي نعطيك فرصة خرى تعتارف وتجبد السميات ولا غتخليني ندوز معاك لحاجة خرى وقد أعذر من أنذر، كرْ ليا بكولشي محدي باقي كنهضر معاك بفمي.أنا تسحابني واش بحال داكشي ديال الأفلام د ميريكان وعلى نيتي قلت ليه: "مغنهضر بتا كلمة تايجي المحامي ديالي" غير سمعوها وبداو كايخراو عليا بضحك قاليا لمحامي!! هو يضحك وقاليهم مينطو ليا ولد لقحبة، قلت معا راسب مبقيتش ولدك وليت ولد لقحبة.دارو ليا لمينوط هو يسولني قاليا راه آخر خطرا غنسولك بفمي عاود لينا على الجريمة كيفاش درتي ليها وعلاش درتيها وجبد ليا سميات ديال لي كانو معاك فالعصابة .أنا غير سمعت ديك العصابة بقيت كنغوت شمن عصابة را والله معارفك علاش كتهضر بالله تا را واقع شي سوء تفاهم مزال كنهضر هو يسكتني بواحد التصرفيقة لاحني بيها من فوق لكورسي وعاودو هزوني وقاليا كر أولد لقحبة هضر يالله بركمت بفمي معرفتش هو ينزل عليا بالتصرفيقة التانية وطلق عليا سد ديال السبان و فاللخر قبل ميخرج قال لبوليس لخرين لي معاه سلخو دينمو مزيان تايكر ولد لقحبى را كولهم فاللول كايضربوها بنكرا وكيقولو مدرتش واش توريوني أنا هاد النوع راني طيحت ضراسي معاهم..مشا هو خرج وخلاهم كايصرفقو و كايعفطو عليا وكايسبو فيا،تعاملو معايا بحال شي مجرم ديال بصح مولف يجي عندهم وأنا والله مداير شي حاجة قسما بالله معارف أمي تاعلا شمن بنت كيهضرو ومعارف تا واش كانت شي بنت فجنان لعوابسي ديك الليلة ومفاهم تا شنو كيقولو را كاين شي غلط ميمكنش هدشي خص لحق يبان،راه أبا والله تا مضلوم تيقو بيا والله مداير شي حاجة وا الله مفهمت شنو واقع واش كنحلم ولا شنو!فيقوني الله يحن عليكم..

وحنا كنسمعو لخويا بدر كيعاود اش طرا ليه مع لبوليس كنت أنا و لواليدا ولواليد كنبكيو وكنصبرو فيه.مي قالت ليه: سمع أولدي حنا تايقين فيك وعارفينك مضلوم وهدشي لي تقال عليك مافيكش ومايمكنش دير شي حاجا بحال هادي راك تربية يدي وانا عارفا شنو والدا وشنو مربيا وهادو لي ضربوك أولدي يعطيهم ضربة مزال توريهم ليام،الحق أولدي را كايبان وخا يغطيوه تا يعياو غادي يبان، وراه درنا ليك محامي وحنا مستاعدين نبيعو عليك الغالي و النفيس غير متبقاش فهاد لمحنة.نطق  الواليد وقاليه انا را نبيع لمحال بلي فيه على ودك أولدي متخافش را والله منخليك وصبر را  كولشي غيفوت نشاء الله..باقيين كنهضرو مع خويا بدر هو يجي عندنا واحد البولبسي وبدا كيصفق بيديخ وكيغوت الله يجعل البركة را درنا غا بوجه السي عبد السلام وصا عليكم أما را مدخلوش عندو ومغتكلسوش معاه هكا صافي سالا لوقت.

مني خرجنا من عند خويا بدر كنا كاملين مدمرين الدموع فعينينا كي شي فويت دالروبيني،تاحد فينا مقدر ياكل داك نهار واحد الصدمة و واحد لحالة لي كنا فيها را بحالا راجعين من حرب الرمال.

مزال حنا واقفين حدا باب الكوميسارية هو يوقف علينا المحامي سلم علينا وبدا يستعرض علينا البطولات ديالو أنا عضو فهيئة طاطاطاطا أنا خريج طاطاطاطا أنا لي دافعت على طاطاطاطاطا رابح من القضايا ما يناهز طاطاطاطا...كنعرف كداا وكدية... مور ما غنا لينا يا نا يانا دخل لمسكي مع لواليد وبدا عليه بشوف قضيتو مربوحة كونو هانيين، أشريفة فكي لغباشة،أسيدي نعس على جنب الراحة..تفاهم هو و لواليد وعطاه تسبيق دعشرلاف درهم وقاليه را لا خرجتي ولدي را غادي نزيدك وغنتهلا فيك مزيان انا مكيهمنيش لفلوس لي كيهمني هو ولدي يخرج..مشا لمحامي دخل عند خويا بدر وهضر معاه وعاود ليه خويا كولشي،مني خرج من عندو جا عندنا وبدا كيشرح لينا الخطة باش غيدافع على خويا بدر وفاش حنا غالبين وفاش خاسرين..هو يقولينا راه بدر غيتقدم غدا ومتخلعوش غالبا غادي يهبطوه لحبس بلا حكم،بينما وصلات المحكمة ديالو وغادي يخرج هادشي را عادي متخلعوش را إجراء طبيعي.سالا كلامو وخلا لواليدا كتندب كتصرفق فحناكها ولكشكوشا نازلة من فمها وكتخبط ففخاضها وكتبركَم "ولدي ولدي ولدي...كبدتي اش درنا اسيدي ربي تا تنزلنا علينا هاد لمصيبة.." لواليد كان  بهضرة المحامي وقال بلي غير مصيبة صابتنا حنا المومنين وراه غتفوت والمومن را مصاب،أنا فهاد لوقت غير كنت كنبكي ومخلوع وكنشوف واليديا كيفاش تبهدلو وخويا لي تكرفصو عليه ومداير والو.

مور ما تقدم خويا بدر وهبط لحبس بلا حكام جا عندنا لمحامي للدار قالينا بيلا كاين حل جديد فالقضية مولف كيديرو هو مع الموكلين ديالو وهو لمساوية،نحلو القضية مع عائيلت لبنت لي تغتاصبات بلفلوس نشوفو شحال بغاو والثمن لي تافقتو عليه نعطيوه ليهم ويديرو التنازل بلا مانبقاو طالعين هابطين فالمحاكيم ونتسناو طلب الخبرة وشد ليا نقطع ليك، نتا أسي عبد الله بخيرك الحمد الله عطي ليهم شي بركة وخرج الدري حيت لا بقينا تابعيين المحاكيم را غادي يطول فلحبس بلا حكام.لواليد ولواليدا مني سمعو هاد لبلان عجبهم وقال با لمحامي صافي أنا قابل بهادشي ولكن شكون غيهضر معاهم باش نتافهمو؟قاليه لمحامي ولا عليك انا غنهضر مع المحامي ديالهم راه صاحبي وكنتعارفو وغنشوفو شي حل يرضي كولشي.

دازت تلتيام هو يرجع عندنا المحامي قالينا بيلا لبنت وعائيلتها مباغيين لا فلوس لا والو ومطامعين فتاشي حاجا من غير حق بنتهم وبيلا غيديرو لي فجهدهم وكتر باش ولدكم ياخد أقصى العقوبات،وبدا علينا بمتخافوش انا معاكم و هادي قضية ساهلة خصها غير لوقت..مني قال لينا هاد لخبار لمقودا خرج بحالو وخلا داك شويا ديال الأمل لي كان عندنا ينقص لبروسونتاج ديالو ودخل معانا الشك من جديد..فهاد لوقت حياتنا تقلبات لواليد مبقاش كيمشي لخدمة ومرض بزاف ولواليدا ولات كتكونصومي دوايات بزايد انا كنت كنمشي لمدرسة مرفوع معارف راسي من رجلي كنفكر غي فخويا.

دازت جوج سيمانات وخويا باقي فلحبس بلا حكام مشات لواليدا ولواليد يزوروه دات ليه حوايجو وصاوبات ليه لماكلا لي كتعجبو.. مني رجعو من الزيارة  رجعو بجوج كيبيكو على لحالة لي ولا فيها خويا بدر عمرهم شافوه فداك الشكل كامل مضروب ومدعوق صحتو تهدات غي فهاد المدة القصيرة وهادشي زاد أتر عليهم كتر وسد ليهم الشهية ورجعهم لسهير الليل وتخمام الزايد.. 

الزيارة التانية مشات غي لواليدا عند خويا بدر مامشاش معاها لواليد حيت كان مريض بزاف بقيت معاه انا فالدار كنشوفو فديك لحالة وكنبكي.. مكانش كيقد يهضر كان تزير بزاف وهلكو لمرض والتخمام..سمعت الدقان ومشيت حليت لقيت لواليدا رجعات ولكن هاد لخطرا رجعات بنفس لقفة لي كانت دايا لخويا بدر فالزيارة رجعاتها عامرا كيما داتها مني سولتها علاش بحالا قست شي حبوبة مكيحة تفركعات بلبكا ونواح قالت ليا خوك مقهور لداخل قاليا متجيبيش ليا لقفة مزال را كيديوها ليا وتا لحوايج را داوهم ليا فالسيلون را مخلاو ليا والو أمي غير خليني نضبر راسي هنا بلي كان حسن متعدبي وياكلوه هوما..لواليد سمع هدشي وبغا ينوض من فراشو ومقدرش بقا كيكح وكيشير بصبعو لتيليفون هو ينطق بزز لمحامي..هزات لواليدا التيليفون صونات على لمحامي مجاوبهاش عيات تصوني والو تا طاح الليل عاد عاود صونا هو وبدا بديك سمحو كنت مشغول وطاطاطاطا وداك لخريط ديالو قالت ليه لواليدا خصك تجي ضروري را بغيناك.. جا لمحامي للدار دخل وعاودات ليه لواليدا شكاين وبيلا خويا بدر مكرفص لداخل وخص شي حل يخرج ضروري لمحامي طلب لواليدا تزيدو لفلوس حيت دكشي لي عطاوه تسبيق سالا مع ضوسي وكدا كدا زادتو لواليدا 3000 درهم وقالت ليه تحرك دغيا انا مزاوكاك را ولدي تقهر لداخل،بدا تاني لمحامي طالق علينا لهضرا وكيبيع لينا فالأمل لي مشفنا منو تا حاجا ولد لقحبى غير كيشد لفلوس كيتطلق ليه اللسان ديال لوعود الكاذبة.مني مشا لمحامي بقيت كالس انا ولواليدا حدا لواليد وكانت مي كتهضر معاه وكتعاود ليه دكشي لي قاليها لمحامي وكتضحك وكتبين ليه بيلا را حاسة بلي خويا بدر قريب يخرج،فهاد لوقت لواليد مكانش كيقد يجاوب بلسانو كان غي كيحل فمو وكيبركم ويكح وهدشي كان كيخلعني وشعل فيا لداخل عافيا باغا تشد فكاع لي كان سباب هاد لمصيبة لي صابتنا..صونا التيليفون ديال الدار على غفلة،مشيت نشوف شكون بانت ليا النمرة مامقيداش انا نعيط لواليدا قلتها ليها مني جات جاوبات ديك ألو اللولا غوتات بدررر ولدي نتا هادا أكبدتي ماحسيت براسي تا بديت نغوت واش بدر خويا اريه ليا اريه ضرت ورايا لقيت لواليد واقف بزز متكي على لحيط وكيكح ويبركم بشويا هو؟؟...

يتبع...حيت عييت قسما بالله تا غي داير ليكم لخاطر را مافيا لي يكمل هاد لخرا