دردروفسكي

الجزء الثاني مني جابوني هنا لكوميسارية دخلوني لجيور، بيت مخلط مع الناس كل واحد علاش جايبينو هالي سكران هالي لقاو عندو لحشيش هالي جاي على الضرب و الجرح..واحد شويا سمعت سميتي نوضوني وداوني لواحد لبيت اخر بحال شي بيرو، داوني ليه بوحدي كلسوني على كرسي  وبدا داك لكوميسير لقرع لي داني من الدار كيهضر معايا: سمع أولدي بلا متضيع وقتك ؤ وقتي غادي تعتارف لينا بكولشي وغادي تجبد السميات ديال دوك لي كانو معاك وأنا من جيهتي أولدي غانستاهل معاك وغنتعاون معاك وغنكتبها فالتقرير وهادشي غادي يخفف عليك الحكم بزاف يالله قوليا علاش تعديتو عليها؟ وشكون لي كان معاك؟عطيني غي السميات والله متخاف يالله دوي أولدي.. قلت ليه والله أشاف ما درت شي حاجة وا أقسم لك بالله تا دخلت لدوك جنانات غير نبول را مادوزت تا دقيقة تما وخرجت را غي تزيرت و بلت أشاف والله معارف شيحاجة على هادشي لي كتهضرو عليه وكنقسم ليك بالله معارف لا هاد لبنت لا شنو طرا ليها وا جيبها  لا قالت ليك انا ديوني والله وتقول أنا تانمشي ولكن راني مضلوم..قاليا لكوميسير نتا من النوع لي مكايتعاونش أ أ؟! مناش خايف واش باغي تهز لمونتيف بوحدك؟! زعما راجل غ...

 الجزء الأول: سمحي ليا بزاف ألواليدا حيت مقلت ليك والو على هادشي لي غنعاود فهاد السطورا مزال مسرطيتش داكشي لي طرا لخويا بدر الدين ومزال لموت ديالو جمرة شاعلة فوق قلبك زدتك جمرة خرا بغيبتي لي مكان عندك عليها تا خبار مكنتي عارفاني حي ولا ميت،سمحي ليا أمي عافاك والله مكان عندي شي حل آخر من غير نخبي عليك، بغيتك تعرفي أمي بلي عمرها دازت شي دقيقة بلا منفكر فيك ويسيلو دموعي كيف شي دري صغير.وبغيت تا الواليد وصحابي لقراب رشيد و سيمحمد يسمحو ليا تاهوما على هادشي لي غنكتب،بغيتكم تسمحو ليا حيت خبيت عليكم هادشي ومعمرني نطقت بشي حرف منو لشي حد فيكم وخا كنتو قراب ليا بزاف، سمحو ليا حيت نهار غبرت مقلت لتاشي حد فيكم لافين غادي لاوقتاش غنرجع ومعمري سيفطت ليكم خباري،وبغيت صاحبتي مريم يلا كانت غتقرا هادشي تسمح ليا بزاف على داكشي لي درت معاها وتسمح ليا حيت كاع داكشي لي كنا كنبلانيو ليه بجوج يامات لافاك وكاع لبلانات لي كنا كنحلمو بيهم من زواج وتكمال لقراية برا ولبروجي لي كنا غنبداو بجوج ضربتو ليها فالزيرو وخليتها معارفا راسها من رجليها وكنتمنى تكون بيخير وتكون كملات حياتها مزيان. هادشي راه كان صعيب عليا...

 قرات معايا واحد لبنت سميتها فاطيمة كانت كتسكن فتيمولاي واحد لفيلاج  صغير جا فلجنوب دلمغريب. الناس ديالو كااملين شلوح وكايهضرو غا بالشلحة وهيا اللغة ديالهم تما. فاطيمة الظروف خلاتها ترحل هيا ومها و جوج خوتها صغر منها من تيمولاي لكازا،لحقو على باهم لي كان خدام عساس على واحد لفيلا  فحي فكاليفورنيا.باين فاطيمة كان ضبر لمها على خدمة دير لميناج عند مالين لفيلا لي خدام عندهم داكشي لاش جابهم كاملين لكازا وكراو بيت فالسطح فحي الدريسية. باين فاطيمة مكانش باغيها تقرا كان خايف عليها من المدينة و ماليها وكان كيخاف لا تخرج من تحت جناحو وتعلق ولا يتعدا عليها شي واحد وماليه جهد يكالي عليها وكان أصلا باها كيشوف بلي لمدرسة صالحا غا لبوقلوا أما لبنات را حدهم الدار يا دارهم يا دار راجلها،ولكن مها كانت شرطات عليه قبل ماتجي لكازا بلي فاطيمة غتكمل قرايتها ولا مجايينش،مها كان عندها أمل كبير فيها كانت كنتسناها تقرا وتكبر وتخدم وتخرجهم من ديك لعيشة دزب بيت فسطح ولخدمة مني يطلع الشمس تا تهبط كانت هيا المهدي المنتظر ديالها.باها وافق وخلاها تقرا وأول نهار غنشوفو فيه فاطيمة فالقيسم كان جابها باها وهض...

النظافة من الإيمان   واحد نهار كنا داخلين عند لموعليمة نزهة،وقبل من هاد نهار قالت لينا أي واحد غايجي بشعرو ولا بودنيه ولا بضفارو موسخين غانتفاهم معاه،من الحصة لمجاية بغيت كولشي يبقا يجيني نقي و زوين را النظافة من الإيمان و الوسخ من الشيطان و الإيمان را كايدخل مولاه للجنة ونتوما بغيتو الجنة ولا لا؟ جاوبناها بصوت واحد "نعاااام يا مُعلّمتي بغينا الجنة" يمكن من مور هاد الحصة الجرتومة وضواحيه فالصف اللخر قطعو تيكي فتريبين دجهنم. هيا هاديك مني دخلنا لقيسم وكولاّ شد بلاصتو. ناضت لموعليمة نزهة من لبيرو ديالها لابسة جلابة فالزيتي ضاربة فوق منها طابلية بيضة ماساداش صدايفها وخاركة على راسها زيف كحل،كانت قصيرة وغليضة وكبيرة فلعمر،لون وجها كان زركْ بحال شي واحد مقجوج ،بغيت نوصف ليكم سنانها ولكن مكناش كنشوفوهم بزاف حيت كانت قليلت الضحكة ديما معبسة ومعصبة،الشوفات ديالها كانو كايدخلو لينا واحد الرعب و لْخلعة مقودين أما لا مشات حتا غوتات بداك لحلق عندها را كيضرب زلزلال فلقيسم،كايبان ليك قيسم كامل فيه ربعين طفل كاملين كايترعدو وكايطلبو سيدي ربي فنفسهم غا فوقاش يجي الفرج ويصوني الجرس نخرجو نتقو...

                                                                           علاش مانسيتيش سروالك؟ غي كنريح نخمم فشنو داز على الجرتومة يامات لبتيدائي كنعدرو على طريق الحبس لي شد. واحد لخطرا عطانا كاد أن يكون رسولا واحد البحث نخدموه فالدار على التلوث البيئي ولا شي لعبا بحا هكا ومشينا لديورنا كل واحد فينا كيفاش خرج داك لبحث لي عندو بيسي فدارهم را خرجو  ليه باه ولا خوه ولا مو من تما نيت ولي معندوش را عطاوه والديه لفلوس ومشا دا خمسة دراهم لسيبير وخرجو ليه، أنا كنت من لي داو سانكة لتيمومي مول السيبير وعطيتو العنوان دلبحث مزال مكملت هضرتي قاليا تانتا بحث البيئة والتلوث..باينا سبقوني شي عشرة دلخوت قبل مني وتيراوه لموهيم خرجت لقلاوي وشريت ملف زوين بتلاتة دراهم  وديت لبحث للدار بلا تا منقرا آش فيه. الجرتومة مسكين اليد قصيرة و العين بصيرة السيبير غا كيشوفو موحالش تا واش فايت داخل ليه، كيسحا...

واش على غلاف أ وساد؟ باقي كنعقل فلبتيدائي كان واحد الساط كايقرا معانا ساكن فلكريان كنا كنعيطو ليه الجرثومة كانت مقودا عليه ديال بصح شكالا و مضمونا.   وديك الساعة كانت لبدية ديال لعام قال لينا المعلم السي كمال اللينعل طبونمو جيبو دفتار ديال ميتين وغلاف حمر.   الجرثومة حيت مقودا عليه مشا جمع دفاتر ديال خوتو لقدام وشي دفاتر من عند الجيران وقطع منهم لوراق اللي مامكتوبينش وعطاهم لمو خيطاتهم ليه بلبرا ولخيط وقادات ليه دفتار.ولغلاف ضبر على واحد فلكحل ولصقو ليه. مني جينا نقراو،السي كمال اللينعل طبونمو ناض كيقلب لينا الدفاتر واحد واحد تا وصل عند الجرثومة هو يلقاه حاط دفتار داير ليه النقاب،مغلفو بلكحل،هز السي كمال اللينعل طبونمو داك الدفتار وبدا كايتعجب فيه وكايضحك واحد الضحكة عامرا بالسادية، هو يسولنا كاملين أشمن لون ديال الغلاف قلت ليكم؟ أَ أَ؟ جاوبنا بصوت واحد بحال شي روبووات "غلافٌ أحمرٌ يا معلمي" هو يعاود يسولنا وشنو اللون ديال هاد الدفتار لي فيدي؟؟ جاوبنا عاود "أسود يا معلمي" وأنا قلت ليكم جيبو غلاف أسود؟ حنا عاود "لا يا معلمي".هو يقول للجرثومة سمعتي ليماك قلت...